Korleis komme seg til Finse? 

Finse ligg på det høgaste punktet langs Bergensbana. Tog er den einaste måten å kome dit på, med mindre du går, syklar eller går på ski. Det går ingen bilveg til Finse.

Frå Bergen tek togreisa litt over 2 timar, medan reisa frå Oslo tek om lag 4 timar. Kjem du med bil, kan du parkere på Voss, Ål eller Haugastøl og ta toget vidare. Frå Voss tek turen litt over 1 time, frå Ål om lag 1 time, og frå Haugastøl rundt 20 minutt. 

Via Flåm

Frå Flåm kan du ta Flåmsbana til Myrdal og byte til tog vidare mot Finse. Flåmsbana er ei av Europas mest spektakulære togstrekningar og går mellom Flåm ved Aurlandsfjorden og Myrdal på Bergensbana.

Bergensbana

Reisa til Finse med Bergensbana byr på storslått natur året rundt. Toget går frå Oslo eller Bergen og tek deg gjennom høgfjellet til Finse, nær Rallarvegen og Hardangerjøkulen.

Sykkel på toget

Sykkeltoga har eigne vogner for syklar. Reiser du med eigen sykkel, må du kjøpe sykkelbillett hos Vy. Leiger du sykkel hos Hotel Finse 1222, kan du hente sykkelen på Finse og levere han i Flåm.

Ting å gjere på Finse?

Finse er eit heilårsdestinasjon med aktivitetar for både store og små. Vinteren varer ofte frå desember til slutten av mai, og byr på flotte moglegheiter for fjellski, randonee, trugeturar, skisegling og guida turar. DNT Finsehytta og Hotel Finse 1222 tilbyr også kurs, ekspedisjonstrening, yoga og utleige av turutstyr.

Når snøen smeltar, opnar nye opplevingar seg. Sykle den populære Rallarvegen med eigen eller leigd sykkel, bli med på brevandring på Hardangerjøkulen, utforsk fjella rundt Finse eller besøk Rallarmuseet. Gjennom sommaren kan du også oppleve arrangement som Finsefest.

Kvar kan eg overnatte på Finse? 

På Finse kan du overnatte på Hotel Finse 1222 eller DNT Finsehytta – begge med flott plassering midt i høgfjellet.

Hotel Finse 1222 har røter tilbake til bygginga av Bergensbana og er ein viktig del av norsk jernbanehistorie. Frå ein enkel bod ved stasjonen voks det fram eit hotell som gjorde Finse kjend langt utover landegrensene. I dag kombinerer hotellet historisk atmosfære med storslått natur, omgjeve av dei same fjellandskapa som har fascinert reisande i over 100 år.

Mat & Drikke på Hotel Finse 1222

På Hotel Finse 1222 står gode matopplevingar i sentrum. Her kan du nyte alt frå ein rikhaldig frukostbuffé og smakfulle lunsjar til ein utsøkt treretters middag. Menyen varierer frå dag til dag og blir laga med sesongbaserte og lokale råvarer. Hotellet tilbyr også vegetaralternativ og tek omsyn til allergiar ved førespurnad.
 

DNT Finsehytta ligg 1 223 meter over havet, mellom Hardangervidda og Skarvheimen. Hytta er lett tilgjengeleg med tog og er eit godt utgangspunkt for vandring, sykling på Rallarvegen, brevandring og skiturar. Finsehytta har rom i enkel standard med felles dusj og toalett, og plass til både små og store grupper.

Mat & Drikke på DNT Finsehytta

Nyt gode måltid med magisk utsikt frå DNT Finsehytta. Dagen startar med ein rikhaldig frukostbuffé med heimebaka brød og rundstykke, pålegg, eggerøre, bacon, havregraut og vaflar. Gjennom dagen er kaféen open og serverer mellom anna steinomnsbakt pizza, dagens suppe med brød, kanelsnurrar, vaflar, kaker og varme drikkar. Etter ein aktiv dag i fjellet kan du samle krefter rundt ein smakfull treretters middag. Menyen varierer etter sesong og råvarer, med fokus på heimelaga mat og gode smaksopplevingar.