Solvorn | Gaupne

Der Europas lengste fjord, Sognefjorden, strekkjer seg innover i landet i møte med Jostedalsbreen og Jotunheimen, ligg Luster kommune. Ein stor kommune, som i ei utstrekning på 2702 km2 er mellom dei største kommunane i Sør-Noreg. Her finn de også store delar av nasjonalparkane Breheimen, Jostedalsbreen, Jotunheimen og indre del av Sognefjorden: Lustrafjorden.

Bygdesamfunn

Luster kommune har mange bygdesamfunn med kvar sine særpreg. Gaupne er kommunesenteret med gode servicetilbod. Marifjøra vart til liks med Solvorn bygt opp i ei tid med sjøvegen som kommunikasjonskanal, og har også eit svært verdifullt bygningsmiljø.

Vidare har vi Skjolden, endepunktet på Sognefjorden, og Fortun sjølvsagt, med starten på Sognefjellsvegen - Nord-Europas høgste fjellovergang, og Noregs første nasjonale turistveg som går mellom Luster og Lom.

Bygda Luster ligg også ved fjorden, med Dale kyrkje, den vakre steinkyrkja frå 1240-talet. 

På Ornes finn du Urnes stavkyrkje, verdas eldste, og som står på UNESCO si liste over dei mest verneverdige kulturminna i heile verda

Reis miljøvenleg til og frå Luster!